Bu gün ABŞ hökuməti işini dayandıra bilər
ABŞ Konqresi
Federal hökumətin işinin müvəqqəti maliyyələşdirilməsini nəzərdə tutan qanun layihəsi təsdiqlənməyib.
ABŞ federal hökumətinin maliyyələşdirilməsi dekabrın 20-də axşam saatlarında dayandırıla bilər. Həftənin sonunda hava nəqliyyatının, hüquq-mühafizə orqanları kimi bir sıra xidmət sahələrinin fəaliyyətinə ara verilməsi mümkündür.
Bu, Donald Trampın ilk prezidentliyi dövründə baş vermiş “şatdaun”dan (federal hökumətin işinin dayandırılması -red.) sonra ilk belə hal ola bilər.
Qanun layihəsi Trampın prezidentliyinin ilk iki ili üçün dövlət borc tavanının ləğvini nəzərdə tuturdu. Sənəd Tramp, onun vitse-prezident təyin etdiyi Vans və yeni Hökumətin Səmərəliliyi Departamentinin (DOGE) rəhbəri vəzifəsinə irəli sürülən milyarder İlon Maskın bir gün öncə qarşı çıxdıqları böyük ikipartiyalı paketin əvəzində təklif edilib. Tramp və vitse-prezident bunu “demokratlara hədiyyə” adlandırıb.
D.Tramp qanun layihəsini dəstəkləsə də, dövlət xərclərinə sərt yanaşmasıyla seçilən onlarla respublikaçı onun əleyhinə səs verib. Demokratlar da respublikaçılara gərəkli dəstək vermədiyindən qanun layihəsi sadə səs çoxluğunu belə toplaya bilməyib.
Co Baydenin sözçüsü Karin Jan-Pyerdeyib ki, “indiki prezident respublikaçıların son anda milyarderlərə təklif etdiyi “hədiyyə”ni yox, işini davam etdirmək üçün hökumətə gərəkli ikipartiyalı razılaşmanı dəstəkləyir”.
Bu da ABŞ-nin 875 minədək hökumət işçisinin ödənişsiz məzuniyyətə göndərilməsi anlamına gəlir. Çox önəmli personal da bayram günlərindəki işinə görə maaş almayacaq.
